3,869

کویت: اقامہ لگوانے یا تبدیل کروانے سے قبل اہم امتحان لازم

کویت سٹی: کویت میں اقامہ لگوانے یا تبدیل کروانے سے قبل متعلقہ شعبے سے وابستہ پیشے کا امتحان لازم قرار دے دیا گیا۔

تفصیلات کے مطابق پبلک اتھارٹی برائے افرادی قوت نے واضح کیا ہے کہ مخصوص پیشوں سے وابستہ افراد کے لیے اہلیت کا امتحان لازمی ہوگا۔

اتھارٹی کے ڈائریکٹر جنرل احمد الموسیٰ کا کہنا تھا کہ تارکین وطن کے لیے قابلیت کے امتحانات ابھی بھی جاری ہیں، قابلیت کا امتحان نئے آنے والوں اور اپنے پیشے تبدیل کرنے والوں کے لیے لازمی شرط ہے۔

خیال رہے کہ کرونا وائرس پھیلنے سے روکنے کے لیے احتیاطی اقدامات کے تحت کارکنوں کی بھرتیوں کو روک دیا گیا تھا، جس کے سبب ٹیسٹ خود بخود رک گئے تھے۔

الموسیٰ کا کہنا تھا ملک کے اندر تارکین وطن کے لیے رہائشی اقامہ منتقل کرنے یا ایک پیشے کو دوسرے پیشے میں تبدیل کرنے پر بھی یہی ٹیسٹ لاگو ہوتا ہے۔

انھوں نے کہا مستقبل میں تکنیکی پیشوں کی بڑی تعداد کو اس فہرست میں شامل کرنے کا ارادہ ہے جنھیں یہ قابلیت کا امتحان پاس کرنا ہوگا۔

اس بات کا بھی امکان ظاہر کیا گیا ہے کہ اکاؤنٹنٹس کو بھی اس زمرے میں شامل کیا جائے گا، جس کے لیے جلد ہی اکاؤنٹس ایسوسی ایشن سے مشاورت کی جائے گی۔

ڈپٹی ڈائریکٹر جنرل برائے ترقی و منصوبہ بندی امور ایمان الانصاری کا کہنا تھا کہ پیشہ ور ملازمتوں سے وابستہ عوامی فلاحی سوسائیٹیز کے ساتھ مشاورت سے پیشوں کی فہرست پر کام جاری ہے۔

ذریعہ: اے آر وائی نیوز

اس خبر پر اپنی رائے کا اظہار کریں

اپنا تبصرہ بھیجیں