155

حج کے لیے ویکسینیشن، پاکستان کی سعودی حکومت سے اہم درخواست

سعودی حکومت کی جانب سے عازمین حج کے لیے کرونا ویکسینیشن کی شرط کے سلسلے میں پاکستانی وزارت خارجہ نے سعودی حکومت سے رابطہ کر کے اہم درخواست کر دی ہے۔

تفصیلات کے مطابق حج کے لیے عازمین کے سلسلے میں پاکستان نے سعودی حکومت سے چینی ویکسین رجسٹرڈ کرنے کی درخواست کر دی ہے، پاکستان نے سعودی حکام کے سامنے یہ معاملہ اٹھاتے ہوئے چین کے علاوہ دیگر ممالک کی ویکسینز فوری لگوانا مشکل قرار دے دیا۔

پاکستان نے مؤقف پیش کیا ہے کہ پاکستانیوں نے چینی ویکسین لگوائی ہے، اور ڈاکٹرز دوبارہ کوئی اور ویکسین لگوانے کی اجازت نہیں دیتے، اس لیے عازمین حج کے لیے سعودی وزارت صحت چینی ویکسین کی اجازت دے۔

پاکستان نے درخواست میں یہ بھی کہا کہ عالمی ادارہ صحت (ڈبلیو ایچ او) نے چینی ویکسین کو منظور کر لیا ہے، اس لیے چینی ویکسینیشن کو تسلیم کیا جائے۔

یاد رہے کہ دو دن قبل وفاقی وزیر برائے مذہبی امور اور بین المذاہب ہم آہنگی نور الحق قادری نے بتایا تھا کہ رواں سال محدود پیمانے پر ایس او پیز کے ساتھ فریضہ حج ادا کیا جائے گا، اور اس سلسلے میں وہ سعودی وزارت حج کے ساتھ مکمل رابطے میں ہیں۔

ان کا کہنا تھا حج سے متعلق انتظامات مکمل کر لیے گئے ہیں، حج کی تاریخ اور عازمین کی تعداد سے متعلق اہم اعلان آئندہ ہفتے متوقع ہے، اگر زیادہ تعداد میں عازمین کی اجازت دی گئی تو سرکاری حج پالیسی کا باقاعدہ اعلان کیا جائے گا۔

واضح رہے کہ 9 مئی کو سعودی عرب نے سخت احتیاطی تدابیر کے ساتھ رواں سال حج پروگرام کا اعلان کیا ہے۔

ذرائع: اے آر وائے نیوز اردو

اس خبر پر اپنی رائے کا اظہار کریں

اپنا تبصرہ بھیجیں