138

ای میل کے ذریعے دس کروڑ روپےمانگنے والا مطلوب بھتہ خور گرفتار

سندھ پولیس نے شہر قائد میں کارروائی کر کے ای میل کے ذریعے دس کروڑ روپے بھتہ مانگنے والے ملزم کو گرفتار کرلیا۔

نمائندہ اے آر وائی نیوز کے مطابق پولیس نے کراچی کے علاقے میمن  گوٹھ میں کارروائی کر کے مطلوب بھتہ خور کو گرفتار کیا، جس نے مبینہ طور پر ملزم سے ای میل پر کروڑوں روپے بھتے کا مطالبہ کیا تھا۔

متاثرہ تاجر نے ای میلز موصول ہونے کے بعد پولیس کو شکایت درج کرائی، جس کے بعد مقدمے کا اندراج کر کے جدید ٹیکنالوجی کی مدد سے ملزم کو گرفتار کیا گیا۔

پولیس کے مطابق متاثرہ تاجر نے بتایا تھا کہ اُس سے ملزم نے ای میل کے ذریعے دس کروڑ روپے بھتہ طلب کیا اور رقم ادا نہ کرنے کی صورت میں سنگین نتائج کی دھمکیاں بھی دیں۔

پولیس کے مطابق گرفتار ملزم کی شناخت گل زمان عرف عجوبہ خان کے نام سے ہوئی، جس نے تاجر کو تین ای میلز بھیجیں ۔

تفتیشی افسر کے مطابق ملزم نے تاجر کو پہلی ای میل 8 مئی، دوسری 15 مئی اور تیسری 18 مئی کو بھیجی تھی۔ تاجر نے تینوں ای میلز کے پرنٹ آؤٹ بھی پولیس کو فراہم کیے تھے۔

ذرائع: اے آر وائے نیوز اردو

اس خبر پر اپنی رائے کا اظہار کریں

اپنا تبصرہ بھیجیں